WAGHAHAN LAMPUNG (BENAWANG MAGHGA)

SANAK LUPA DI BAPAK

Di Tulis Ulih: Hazizi Ibn Khaliq

Sangun benogh cawa ni sai tuha, “ki bapak kaya anak jadi Ghaja, Ki anak kaya bapak jadi bedua”. (kalau ayah kaya anak jadi raja, kalau anak kaya ayah jadi pelayan).  Ajo wat sai ceghita, kisah sanak lupa di bapak. Tengis pai pun!!!

Wat sanak 7 muaghi hughik jama bapak ni, emak ni mak lagi. Sesol ni bapak ni mak kuat lagi. Mak dapok keghajja tangih usaha. Gelagh ni khadu tuha, unyin penyakik di ghasa. sebab hijjo lah anak-nak ni ngeghasa disusahko ulih bapak ni sai meghuyuh ghadu beni. Sanak 7 sai jak lunik hughik bangik. Unyin peghetok tiyan togok di tughuti. Ulih bapak ni mak keghajja lagi, tian jadi lupa jama ia.

Tiyan 7 mufakat haga ngebuang bapak ni mit las “lapah adek gham tibuang gawoh bapak jo, ki hughik beni, haga nyusahko gham gawoh” bujuk abang ni sai tuha jama adek-adek ni. Sanak 7 muaghi bakas  sangun makkung bulambanan, tiyan hughik pujama jama bapak ni dilom sai lamban. Adek-adek ni sai enom nughut gawoh api cawa abng ni.

Togoklah di ghani  tiyan 7 haga ngebuang bapak ni.  bapak ni mak menyana sekali api sai di gheccaka ko anak ni. Tiyan butangguh jama bapak ni ngajak ia mamidoghan mit huma. Bugeleghan tiyan nunggang bapak ni makai kawogh  (peghing) sai ti bulup makai hinjang. Ghupa ni haga mejaoh tiyan ngebuang bapak ni mit las, luppak way ghik  cakak tebing tiyan haga ninggal ko bapak ni. “Ghappa bang, pik ko dija kodo” Tanya sai ngugha. “Kanah tak unggak dudi”  timbal ni sai tuha. Tambah beni tambah debi, sedong bekal ghadu bela.

Makkung togok di tujuan sanak 7 hinno kebetohan. Di lom lapahan tiyan ngeliak buah jambu sai ghebu .Seghaduna  ngakuk jambu hinno. Tiyan nganik jambbu sappai bela ghik betong. Sappai lupa jama bapak ni sai jak pagi makkung mengan.. “kruk-kruk” suagha tenay bapak ni tanda ia kebetohan. Bapak ni mak di keni sekali, padahal bapak ni pandai ki tiyan pitu lagi wat sai di kanik. Jak bulupan hinjang bapak ni nengis. Pelegohan bapak ni cawa “Nganik api kutti nak, mula bapak mu mak di keni?, “Tumbai nyak lagi ngugha mak ku kanik babuak jak peghwatin kala nyak battu ku teda ko pakai kutti” (Makan apa kalian nak?, dulu sewaktu saya muda, tidak saya makan makanan dari tetangga-tetangga saat saya bantu, ku bekalkan untuk kalian).

Jak nengis cawa bapak ni jinna sanak pitu  keingok, betapa kahut  bapak ni jama tiyan. bapak ni ghila mak nganik demi anak-anak. Kidang pas ia tuha, tangih haga nyenangko bapak ni, malah tiyan haga ngebuang bapak ni sai ghadu mak budaya. Selaju ni tiyan miwang ngingok ko kelakuan tiyan jama bapak ni sai dughhaka. Akhirni tiyan mak laju ngebuang bapak ni, ghik bujanji haga ngughusko ia sappai kapanpun.